عرب ثالثوں کی جنگ بندی معاہدے کو ٹوٹنے سے بچانے کی کوششیں

دوحہ :عرب ثالثوں قطر اور مصر نے جنگ بندی معاہدے کو ٹوٹنے سے بچانے کی کوششیں تیز کردی ہیں۔ قطر اور مصر اسرائیل اور حماس کے درمیان معاہدے پر عملدرآمد سے متعلق اختلافات کو دور کرنے کیلئے شدت سے کام کررہے ہیں۔ حماس کا ایک وفد موجودہ بحران کو ختم کرنے کے طریقوں پر تبادلہ خیال کرنے کے لیے قاہرہ پہنچا ہے۔ حماس کے ایک سینئر عہدیدار محمود مرداوی نے کہا کہ مثبت اشارے ہیں کہ یرغمالیوں کی حوالگی منصوبہ بندی کے مطابق آگے بڑھے گی۔ انہوں نے مزید کہا کہ ابھی تک معاہدے کی مکمل شرائط، خاص طور پر انسانی پروٹوکول پر عمل درآمد کے لیے اسرائیل کا عزم حاصل کرنا باقی ہے۔ ادھر اسرائیلی چینل 12 نے رپوٹ دی ہےکہ اسرائیلی حکام غزہ کیلئے امداد کی مقدار میں اضافہ کرنے کے لیے تیار ہیں، جس سے ممکنہ طور پر حماس کے قیدیوں کی رہائی کی راہ ہموار ہو جائے گی۔ العربی الجدید نیوز ویب سائٹ نے مصری حکام کا حوالے سے بتایاہےکہ بین الاقوامی تنظیموں کو غزہ میں ایندھن اور طبی آلات لانے کی منظوری مل گئی ہے۔ جس سے قیدیوں کا تبادلہ مکمل ہو سکے گا۔