قرآن سوزی کے واقعات پر عرب ممالک کا اقوام متحدہ میں احتجاج

جنیوا : یورپ میں قرآنِ پاک جلانے کے واقعات کے تسلسل پر عرب ممالک نے اقوام متحدہ میں احتجاج کیا۔ جنیوا میں اقوام متحدہ کے ادارے انسانی حقوق کونسل کا اجلاس ہوا جس میں عرب ممالک نے قرآن پاک کو جلانے کے واقعات پر عالمی خاموشی کو مایوس کن قرار دیا۔ عالمی اداروں نے آزادی اظہار کی آڑ لیکر قرآن جلانے کے واقعات کی مذمت سے گریز کیا۔ عرب ممالک کی نمائندگی کرتے ہوئے اقوام متحدہ میں قطر کی مستقل مندوب ڈاکٹر ہند عبدالرحمان المفتاح نے کہا کہ مسلمانوں کی مقدس ترین کتاب جلانے کے ناپاک واقعات پر عالمی ادارے کا رویہ نہایت مایوس کن ہے جس پر گہری تشویش ہے۔ انہوں نے اقوام متحدہ کے ہائی کمشنر برائے انسانی حقوق سے مطالبہ کیا کہ ایسے واقعات کے سدباب کے ساتھ ساتھ جس ملک میں ایسے واقعات ہوئے ان پر اپنی ذمہ داریاں پوری کرنے کے لیے زور دیں۔ عرب ممالک نے اقوام متحدہ کی انسانی حقوق کونسل پر زور دیا کہ سویڈن سمیت ایسے تمام ممالک جہاں آزادیٔ اظہار رائے کے نام پر مذہب کو نشانہ بنایا جاتا ہے وہاں مذہبی احترام کے بنیادی حقوق کی پاسداری کو یقینی بنایا جائے۔