Raza Musani 
افغانستان کے صوبہ بدخشان کے انفارمیشن ادارے کے سربراہ معز الدین احمدی نے بتایا ہے کہ دھماکہ بدخشان کے ڈپٹی گورنر نثار احمد احمدی کی مجلس فاتحہ خوانی کے موقع پر ہوا جس میں کم سے کم پندرہ افراد جاں بحق اور چالیس دیگر زخمی ہوئے، دھماکہ اس وقت ہوا جب منگل کو ایک دہشت گردانہ حملے میں مارے گئے صوبے کے ڈپٹی گورنر کے لئے مسجد میں فاتحہ خوانی کا اجتماع جاری تھا۔
قابل ذکر ہے کہ صوبہ بدخشان کے ڈپٹی گورنر نثار احمد احمدی کو منگل کے روز ایک خودکش حملے میں مار دیا گیا تھا۔ اس دھماکے میں ان کا ایک ساتھی بھی ہلاک جبکہ چھ دیگر زخمی ہوئے تھے۔ داعش دہشت گرد گروہ نے ان کے قتل کی ذمہ داری قبول کر لی ہے۔
گذشتہ چار ماہ کے دوران طالبان کے یہ تیسرے اعلی عہدے دار ہیں جنہیں داعش نے ہلاک کیا ہے ۔ طالبان کی حکومت کی جانب سے داعشیوں سے مقابلے کے دعووں کے برخلاف، اس دہشت گرد گروہ کے ارکان اب بھی افغانستان کے مختلف علاقوں میں موجود ہیں اور وقفے وقفے سے اپنی دہشت گردانہ کارروائیاں انجام دیتے رہتے ہیں ۔
ادھر صوبہ بغلان میں بھی طالبان کا ایک کمانڈ ر اپنے کئی ساتھیوں کے ہمراہ مارا گیا ہے۔
