یمنی فوج کا ایک اور بحری جہاز پر میزائل حملہ

صنعا: یمنی فوج نے الحدیدہ کے قریب ایک اور جہاز کو میزائل سے نشانہ بنادیا۔ برطانوی میری ٹائم سیکیورٹی کمپنی ایمبرے نے کہا کہ کارگو جہاز پر مارشل جزائر کا جھنڈا لہرا رہا تھا اور یونان کی ملکیت کا تھا۔ ادھر امریکی طیاروں اور اتحادی جنگی جہاز نے بحیرہ احمر میں پانچ ڈرونز کو ایک حملے میں تباہ کر دیا۔ امریکی سینٹرل کمانڈ نے کہا ہے کہ یہ ڈرون یمن سے بھیجے گئے تھے اور وہ امریکی تجارتی جہازوں اور اتحادی جہازوں کے لیے انتہائی خطرے کا باعث تھے۔ ادھر الحدیدہ میں ایک جزیرے پر امریکی-برطانوی فوج کی جانب سے بمباری کی گئی ہے۔ پینٹا گون نے بحیرہ احمر میں شروع کیے گئے حملوں کے بعد اب تک یمن پر حملے کر کے مجموعی طور پر 230 مراکز کو نشانہ بنایا ہے۔