اسرائیلی فوج کی ایک اور رسوائی، نیٹزارم کوریڈور سے مکمل انخلاء

غزہ: اسرائیلی فوج نے نیٹزارم کوریڈور سے بفر زون کی طرف انخلاء مکمل کر لیا ہے اور فلسطینیوں کو نقل وحرکت کی آزادی مل گئی۔ نیٹزارم کوریڈور پر پندرہ ماہ سے قابض صیہونی فوج نے علاقے کو مکمل تباہ کردیا ہے۔ کوئی عمارت باقی نہیں بچی، سڑکوں اور زرعی اراضی پر بلڈوزر چلادیا گیا ہے۔
علاقے سے بے گھر کئے گئے فلسطینوں کا یہاں قیام بہت مشکل ہوگا اس کے باوجود نقل وحرکت کی آزادی ملتے ہی فلسطینی علاقے میں لوٹنا شروع ہوگئے ہیں۔
حماس نے اسرائیلی فوج کے انخلا کو ایک اور ناکامی سے تعبیر کیا ہے۔ حماس نے ایک بیان میں کہا کہ بے گھر فلسطینیوں کی گھروں کو واپسی اور قیدیوں کا تبادلہ غزہ میں مکمل فتح کے نیتن یاہو کے جھوٹ کی تردید کرتا ہے۔ بیان میں کہاگیاہے کہ غزہ ایک ایسی سرزمین رہے گا جسے اس کے عوام اور اس کے جنگجوؤں کے ہاتھوں آزاد کرایا جائے گا۔