کراچی یونیورسٹی میں سالانہ یوم حسینؑ کا انعقاد

کراچی : کراچی یونیورسٹی میں کربلا آغاز مقاومت، امام حسینؑ امام مقاومت کے عنوان سے سالانہ یوم حسینؑ منعقد کیا گیا۔ یوم حسینؑ امامیہ اسٹوڈنٹس آرگنائزیشن پاکستان جامعہ کراچی یونٹ اور دفتر مشیر امور طلبہ کے زیر اہتمام پارکنگ گراؤنڈ میں ہوا۔ یوم حسینؑ کی صدارت شیخ الجامعہ پروفیسر ڈاکٹر خالد محمود عراقی نے کی۔ یوم حسینؑ میں طلبہ و طالبات سمیت اساتذہ کی بڑی تعداد شریک تھی۔ پروگرام سے علامہ سید ناظر عباس تقوی، جماعت اسلامی پاکستان کے مرکزی نائب امیر ڈاکٹر معراج الہدیٰ صدیقی، رئیس کلیہ معارف اسلامیہ پروفیسر ڈاکٹر زاہد علی زاہدی۔ فلسطین فاؤنڈیشن پاکستان کے مرکزی سیکریٹری جنرل ڈاکٹر صابر ابو مریم اور دیگر مقررین نے خطاب کیا اور فلسفہ امام حسینؑ پر روشنی ڈالی، مختلف نوحہ خوانوں نے بارگاہ امامت میں نذرانہ عقیدت پیش کیا۔ طلبا نے فلسطین کی حمایت اور امریکا و اسرائیل کے خلاف احتجاج بھی کیا، جس میں شرکاء نے بڑی تعداد میں فلسطین کے پرچم بلند کرکے شعار بلند کئے۔