آزاد کشمیر میں ہڑتال اور احتجاج ختم کرنے کا اعلان

مظفرآباد: جوائنٹ عوامی ایکشن کمیٹی نے آزاد جموں و کشمیر میں ہڑتال اور احتجاج ختم کرنے کا اعلان کر دیا۔ جوائنٹ عوامی ایکشن کمیٹی کا کہنا ہے کہ گزشتہ روز حکومت نے مظاہرین کے تمام مطالبات مان لیے تھے۔ تحریک ختم کرنے کے اعلان کے بعد منگل کو پانچویں روز ٹرانسپورٹ جزوی طور پر بحال ہو گئی ہے۔ مختلف اضلاع سے لانگ مارچ کے شرکاء کی اپنے اپنے علاقوں میں واپسی شروع ہو گئی ہے۔ جوائنٹ عوامی ایکشن کمیٹی کے ترجمان کے مطابق احتجاجی تحریک کے دوران تین افراد کے جاں بحق ہونے پر یومِ سوگ منایاجارہا ہے، مظفر آباد میں تمام نجی و سرکاری تعلیمی ادارے بند ہیں۔ آزاد کشمیر کے مختلف اضلاع میں انٹرنیٹ سروس کہیں معطل اور کہیں متاثر ہے جس کے باعث شہریوں کومشکلات کا سامنا ہے۔ احتجاجی تحریک میں جاں بحق ہونے والے تین شہریوں کی نمازِ جنازہ ادا کردی گئی۔