چینی باشندوں پر حملے سے پاک چین تعلقات میں خلل ڈالنے کی کوشش کی گئی، وزیر خارجہ

اسلام آباد: نائب وزیراعظم اور وزیرخارجہ اسحاق ڈار نے کہاہے کہ چین نے سیکیورٹی مسائل حل ہونے تک اپنے لوگ پاکستان بھیجنے سے انکار کردیا ہے۔ سینیٹ کمیٹی برائے خارجہ امور میں بریفنگ دیتے ہوئے وزیرخارجہ نے کہا کہ چینی باشندوں پر حملے سے پاک چین تعلقات میں خلل ڈالنے کی کوشش کی گئی، چین سیکیورٹی کے حوالے سے بہت حساس ہے اور اس کا واضح مؤقف ہے کہ جہاں سیکیورٹی مسائل ہوں وہاں لوگ نہیں بھیج سکتے۔ وزیرخارجہ نے کہا کہ سفارتی سطح پر پاکستان کے لیے معاملات بہت بہتر ہو رہے ہیں اور پاکستان سفارتی تنہائی سے نکل آیا ہے۔ انہوں نے افغانستان کے حوالے سے بریفنگ دیتے ہوئے بتایا کہ تحریک طالبان پاکستان اس وقت افغانستان میں موجود ہے، افغانستان سے ہمارا بہت قریبی تعلق تھا اور رہے گا۔ آپ اپنے پڑوسی تبدیل نہیں کرسکتے۔ اسحاق ڈار نے کہا کہ کچھ لوگ ملک میں مایوسی پھیلا رہے ہیں، ایسے عناصر عوام میں مایوسی پھیلانا بند کردیں، پاکستان کے پاس کھربوں ڈالرز کے قدرتی وسائل ہے۔