امریکا کا سلیکون ویلی بینک بند، اثاثے ضبط، عالمی مالیاتی منڈی میں ہلچل

واشنگٹن : امریکا میں ریگولیٹرز نے سلیکون ویلی بینک کو بندکرکے اس کے تمام اثاثے ضبط کرلئے جس سے عالمی منڈیوں میں ہلچل مچ گئی ہے۔ کیلیفورنیا کے محکمہ مالیاتی تحفظ اور اختراع نے بینک کو بند کرنے کا حکم دیا اور فیڈرل ڈپازٹ انشورنس کارپوریشن کو بینک کا وصول کنندہ مقرر کردیا۔ اسے صارفین کے پیسے کو محفوظ رکھنے کی ذمہ داری بھی دی گئی ہے۔2008 کے عالمی اقتصادی بحران کے بعد ناکام ہونےوالا سب سے بڑا ریٹیل بینک ہے جس کی بندش نے عالمی منڈیوں میں ہلچل مچا دی ہے کیونکہ یہاں کمپنیوں اور سرمایہ کاروں کے اربوں ڈالر پھنسے ہوئے ہیں۔ گزشتہ 18 مہینوں میں فیڈرل ریزرو کی جانب سے شرح سود میں اضافے سے ٹیک کمپنیوں میں سرمایہ کاروں کی دلچسپی کم ہوئی ہے، بینک اس وقت بحران کا شکار ہوا جب ٹیکنالوجی ورکرز اور وینچر کیپیٹل کی مدد سے چلنے والی کمپنیوں نے اپنا پیسہ نکالنا شروع کر دیا۔ بینک کے پاس 209 ارب ڈالر کے اثاثے اور 175.4 ارب ڈالر کے ذخائر موجود تھے۔ یہ بینک نئے دور کی ٹیک کمپنیوں اور وینچر کیپیٹل میں سرمایہ کاری کرنے والی کمپنیوں کو مالی مدد فراہم کرتا تھا۔