امریکا کا غزہ میں حماس سے پاک گرین زون قائم کرنے کا منصوبہ

واشنگٹن : امریکہ غزہ میں حماس سے پاک ’’گرین زون‘‘ قائم کرنے کی کوشش کر رہا ہے، جس کا مقصد بے گھر فلسطینیوں کے لیے عارضی رہائشی علاقے بنانا بتایا جا رہا ہے۔
امریکی اخبار وال اسٹریٹ جرنل کے مطابق امریکہ نے غزہ کے اسرائیلی کنٹرول والے علاقوں میں متبادل محفوظ کمیونٹیز کے لیے منصوبے تیار کیے ہیں۔ ان علاقوں کو گرین زون کا نام دیا گیا ہے۔ جنوبی اسرائیل میں سویلین- ملٹری کوآرڈینیشن سینٹر میں سائٹ پر موجود امریکی حکام کے مطابق انجینئرنگ ٹیموں نے نئی بستیاں قائم کرنے کے منصوبوں پر کام شروع کر دیا ہے۔ حکام کے مطابق یہ ٹیمیں ملبہ اور نہ پھٹنے والے گولہ بارود کو بھی ہٹا رہی ہیں۔ رپورٹ کے مطابق گرین زون میں مکانات، اسکول اور اسپتال تعمیر کیے جائیں گے تاکہ جنگ کے باعث بے گھر فلسطینیوں کو عارضی سہولت فراہم کی جا سکے۔
پہلا منصوبہ رفح میں قائم کیا جائے گا جو اس وقت مکمل طور پر اسرائیلی کنٹرول میں ہے۔ امریکی اور اسرائیلی حکام نے اسے اس حقیقت کا اعتراف قرار دیا ہے کہ حماس کو فوری طور پر اختیارات سے ہٹانا ممکن نہیں۔ ان علاقوں کی حفاظت بین الاقوامی فورسز یا فلسطینی پولیس کے سپرد کرنے کی تجویز ہے۔