امریکا اسرائیل کے شیطانی اقدامات کی حمایت بند اور یمن کے شہریوں کے قتل عام سے باز رہے، ایران

تہران : ایران کے وزیر خارجہ عباس عراقچی نے کہا ہے کہ امریکی سیاستدان اور حکام اسرائیلی حکومت کے شیطانی اقدامات اور دہشت گردی کی کارروائیوں کی حمایت بند کریں۔ سوشل میڈیا پر جاری بیان میں عباس عراقچی نے غزہ میں اسرائیلی دہشت گردی اور نسل کشی کے لیے امریکی حکومت کی حمایت کی مذمت کی۔ انہوں نے کہا کہ امریکا نے غزہ میں نشل کسی کیلئے اکتوبر 2023 سے ستمبر 2024 کے درمیان دسیوں ارب ڈالر خرچ کیے تھے۔ غزہ میں قتل عام کا دنیا امریکہ کو مکمل طور پر جوابدہ ٹھہراتی ہے۔
انہوں نے یمن پر امریکی حملے کی مذمت کرتے ہوئے کہاکہ امریکا یمن کے بنیادی ڈھانچے اور شہری مراکز پر جارحانہ حملے اور شہریوں کے قتل عام سے باز رہے۔ ایران کو دھمکیوں پر عباس عراقچی نے کہا کہ ایران کی خارجہ پالیسی پر امریکی کنٹرول کا دور 1979 کے اسلامی انقلاب کے ساتھ ختم ہوا۔ اب امریکا کو ایران کی خارجہ پالیسی کا حکم دینے کا کوئی اختیار نہیں ہے۔