Raza Musani 
اسلام آباد: چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے کہاہےکہ غاصب اسرائیل کے ساتھ ساتھ اس کے سہولت کار بھی نیست و نابود ہوں گے۔ 16 مئی یوم مردہ باد امریکہ و اسرائیل کی مناسبت سے بیان میں سینیٹر علامہ راجہ ناصر عباس نے کہاکہ امریکہ نے جس ناجائز ریاست کی بنیاد رکھی تھی وہ اپنے منطقی انجام کی طرف تیزی سے بڑھ رہی ہے۔ امریکہ کے اسرائیل کو تحفظ فراہم کرنے کے تمام تر حربے ناکام چکے ہیں، پورے غزہ سمیت رفح پر غاصب اسرائیل کے حالیہ حملے اور ظلم وبربریت اس کے تابوت میں آخری کیل ثابت ہو گا۔ انہوں نے کہا کہ فلسطینی مظلومین پر سات ماہ سے جاری سفاکانہ اور ظالمانہ کاروائیوں کے باوجود بھی اسرائیلی آرمی اپنے مقاصد میں ناکام ہے حتیٰ پانی و خوراک کی کمی کو جنگی ہتھیار بنانا بھی ان کے حوصلے پست نہیں کر سکا۔ فلسطینی عوام کی نسل کشی امریکہ اور اس کے حواری ممالک کی ایماء پر ہو رہی ہے۔۔ بچوں، بوڑھوں، خواتین اور جوانوں کی المناک شہادت پر دلی افسوس ہوا ہے، ان حملوں سے تحریک مزاحمت کو دنیا بھر میں پذیرائی حاصل ہونے کے ساتھ ساتھ فلسطینی مظلومین کی مقاومت میں اضافہ ہوا ہے۔ارض فلسطین پر کوئی دن ایسا نہیں کہ بے گناہ مسلمانوں کا خون نہ بہا ہو اور کوئی شام ایسی نہیں گزری کہ کسی ماں کی گود نہ اْجڑی ہو، یہاں ہر روز قیامت ہے۔ ہم کل بھی امریکہ کی سرپرستی میں اسرائیل کے جارحانہ اقدامات، متکبرانہ اور جارحانہ رویوں کی وجہ سے اسے مردہ باد کہتے تھے۔ آج بھی کہتے ہیں اور اس وقت تک کہتے رہیں گے کہ جب تک دنیا اس کے نجس وجود سے پاک نہیں ہو جاتی۔
