طوفان الاقصیٰ نے گریٹر اسرائیل کا خواب چکنا چور کردیا، اسامہ حمدان

بیروت : سینئر حماس رہنما اسامہ حمدان کا کہنا ہے کہ آپریشن الاقصیٰ فلڈ فلسطینی جدوجہد کی تاریخ میں ایک سنگ میل بن چکا ہے۔ جس نے نام نہاد گریٹر اسرائیل کے خواب کو چکنا چور کر دیا۔
بیروت میں میڈیا سے گفتگو میں اسامہ حمدان نے کہا کہ 2023 میں فلسطینی مزاحمتی گروہوں کا یہ آپریشن اسرائیلی ریاست کے خاتمے کی تمہید ثابت ہوا۔ ان کا کہنا تھا کہ اسرائیل کا خطرناک حملہ تباہی نہیں بلکہ نیتن یاہو کا گریٹر اسرائیل کے منصوبے پر اصرار ہے۔ انہوں نے اسرائیل کو ایک جارح ریاست قرار دیتے ہوئے کہا کہ یہ صرف فلسطینیوں ہی نہیں بلکہ لبنان، یمن، شام، عراق، ایران اور قطر پر بھی حملہ آور ہے۔ اسامہ حمدان کا کہنا ہے کہ دو سال سے جاری اسرائیلی جارحیت کے باوجود تل ابیب اپنے کسی بھی فوجی یا سیاسی مقصد میں کامیاب نہیں ہو سکا۔ انہوں نے کہا کہ فلسطینی عوام نے دنیا کو یہ ثابت کر دیا ہے کہ وہ محاصرے اور نسل کشی کے باوجود اپنی سرزمین پر ڈٹے ہوئے ہیں۔