مسجد الاقصی ٰ ریڈ لائن،بے حرمتی برداشت نہیں،فلسطینی تنظیمیں

صہیونی حکومت مسجد الاقصیٰ کی اسلامی شناخت ختم اور یہودی رنگ دینے کی کوشش کر رہی ہے،شناخت بچانے کا واحد ذریعہ اسرائیل کی نابودی ہے،تحریک اسلامی
 سینچری ڈیل پر عملدرآمد کی تمام کوششوں سے بھی حقائق تبدیل نہیں ہو سکتے،حماس،طاقت کا تواز ن تبدیل کرنے کی بھرپور طاقت و توانائی رکھتے ہیں،جہاد اسلامی
غزہ (نیوز ڈیسک) فلسطینی گروہوں نے ایک بار پھر صہیونی حکومت کو خبردار کیا ہے کہ مسجد الاقصی فلسطینیوں کے نزدیک ریڈلائن ہے اور اس کی بے حرمتی کسی بھی قیمت پر برداشت نہیں کی جائیگی ، تحریک اسلامی کے سربراہ شیخ زائد صلاح نے 3سال تک گھر میں نظربند رہنے کے بعدنیوز کانفرنس میں کہا کہ غاصب صہیونی حکومت مسجد الاقصیٰ کی اسلامی شناخت ختم کرنے کے مقصد سے اسے یہودی رنگ دینے کی کوشش کر رہی ہے، مسجد الاقصیٰ کا اسلامی و عربی تشخص اور اسکی شناخت بچانے کا واحد ذریعہ غاصب صہیونی حکومت کی نابودی ہے، حماس کے ترجمان فوزی برہوم نے بھی مسجد الاقصیٰ میں باب الرحمہ بند کرنے کے لئے غاصب صہیونی حکومت کی کوشش کے خلاف مظاہرے کی طرف اشارہ کرتے ہوئے کہا کہ امریکا و اسرائیل کے سازشی منصوبے سینچری ڈیل پر عملدرآمد کی تمام کوششوں سے بھی حقائق ہرگز تبدیل نہیں ہو سکتے،جہاد اسلامی کے سینئر رکن خضر حبیب نے کہا کہ فلسطینی عوام ایسا ہرگز نہیں ہونے دیں گے کہ غاصب صہیونی حکومت مسجد الاقصیٰ اور بیت المقدس پر قبضہ کرنے کے لئے اپنے کسی منصوبے پر عمل کرنے میں کامیاب ہو سکے، جہاد اسلامی کے سیکریٹری جنرل زیاد النخالہ نے صہیونی دشمن کو خبردار کیا کہ جہاد اسلامی تنظیم، خطے میں طاقت کے توازن کو اپنے حق میں تبدیل کرنے کی بھرپور طاقت و توانائی رکھتی ہے۔