Raza Musani 
لاہور : پاکستان کے شہر لاہور میں مصر کی درسگاہ جامعہ الازہر کی شاخ کے قیام کا اصولی طور پر اتفاق ہو گیا۔ یہ فیصلہ وزیر مذہبی پیر نور الحق قادری اور مصر کے سفیر طارق دحروج سے ملاقات کے دوران کیا گیا۔ پیر نور الحق قادری نے بتایا کہ لاہور میں جامعہ الازہر کالج قائم کیا جائے گا۔ مصر کی جامع الازہر اساتذہ، نصاب اور کتب فراہم کرے گی۔ کالج کے دیگر انتظامی امور پاکستان کے پاس ہونگے۔ وزارتِ مذہبی امور، وزارتِ تعلیم، وزارتِ خارجہ، پنجاب اوقاف پر مشتمل ورکنگ گروپ تشکیل دیا جائے گا۔جامعہ الازہر کالج کے قیام کیلئے مصری حکومت کیساتھ جلد باضابطہ معاہدہ کیا جائے گا۔ مصری سفیر طارق دحروج نے کہا کہ کالج میں جامع الازہر اور پاکستان کا مشترکہ نصاب پڑھایا جائے گا۔ انہوں نے کہا کہ طلبا و طالبات، آئمہ و خطبا کیلئے ڈگری اور شارٹ کورسز آفر کیے جائیں گے۔ فتوی ڈگری کے علاوہ تفسیر، فقہ، تجوید، سیرت پر مبنی مختصر کورسز پڑھائے جائیں گے۔ اس ضمن میں وزیر اوقاف پنجاب پیر سعید الحسن نے کہا کہ دونوں ملکوں کے مابین تعلقات کو ایک نئی جہت ملے گی۔
