تباہی اور قتل عام کے بعد صیہونی فوج کی جنین کیمپ سے پسپائی

جنین: صیہونی فوج جنین پناہ گزین کیمپ میں دو دن تک تباہی اور قتل عام کے بعد پیچھے ہٹ گئی۔ وحشیانہ کارروائی میں بارہ فلسطینی شہید اور سو سے زائد زخمی ہوئے۔ صیہونی فوج نے مزاحمت کاروں کیخلاف آپریشن کی آڑ میں مغربی کنارے کے جنین پناہ گزین کیمپ میں درندگی اور وحشت کا بازار گرم کیا۔ صیہونی فوج دو دن تک علاقے میں بغیر روک ٹوک تباہی مچاتی رہی اور قتل عام کرتی رہی۔ اس خونی کھیل میں 12 فلسطینی شہید اور سو سے زائد زخمی ہوئے۔ جس میں سے بعض کی حالت تشویشناک ہے۔ جوابی کارروائی میں ایک صیہونی فوجی بھی مارا گیا۔ سفاکی کا مظاہرہ کرنے کے باجود صیہونی فوج اپنے اہداف حاصل نہ کرسکی۔ مجاہدین کی شدید مزاحمت کے باعث اسے مزید نقصان سے بچنے کیلئے پسپائی اختیار کرنا پڑی۔ جبکہ تل ابیب میں فلسطینی نوجوان نے کار سے کچل کر اور چاقو سے وار کرکے 7 صیہونیوں کو زخمی کردیا۔ مسلح شہری نے نوجوان کو گولی ماردی۔ صیہونی فوج نے جنین کے بعد غزہ کو اپنے حملے کا نشانہ بنایا ہے۔ صیہونی جنگی طیاروں نے شمالی غزہ میں بیت لاہیہ کے قریب مختلف مقامات پر میزائل داغے۔ جس سے عمارتوں کو نقصان پہنچا۔ صیہونی فوج نے دعویٰ کیا ہے کہ یہ حملہ غزہ سے راکٹ حملے کے جواب میں کیا گیا۔