مالدیپ کے بعد بنگلہ دیش میں بھی انڈیا آؤٹ مہم زور پکڑ گئی

ڈھاکا: مالدیپ کے بعد ہندوستان کا ایک اور پڑوسی ملک بنگلہ دیش بھی ’انڈیا آؤٹ‘ تحریک میں شامل ہو گیا ہے۔ بنگلہ دیش میں سات جنوری کے انتخابات کے بعد ہندوستانی مصنوعات کے بائیکاٹ کی مہم زور پکڑ گئی ہے۔ بنگلہ دیش میں پنکی بھٹاچاریہ سمیت کئی یوٹیوبرز نے ہندوستانی مصنوعات کے بائیکاٹ کی مہم کا آغازکیا تھا۔ ان کی کال پر کئی مشہور شخصیات نے مہم میں شمولیت اختیار کرلی۔ ان کا کہنا ہے کہ ہندوستان نے بنگلہ دیش کے عوام کو غیر منصفانہ طور پر انتخابی حق سے محروم کر رکھا اور وہ موجودہ حکومت کی غیر منصفانہ حمایت کر رہا ہے۔ بنگلہ دیش نیشنل پارٹی سمیت اپوزیشن کی کئی جماعتوں نے انتخابات کا بائیکاٹ کیا تھا وہ بھی اب باضابطہ طور پر اس تحریک میں شامل ہوگئی ہے۔ بی این پی کے سینئر جوائنٹ سیکرٹری جنرل ایڈوکیٹ روح کبیررضوی نے ہندوستانی مصنوعات کے بائیکاٹ کا باقاعدہ آغاز اپنی ہندوستان چادر عوام کے سامنے پھینک کر کیا۔