سلامتی کونسل میں 40 دن بعد جنگ میں وقفہ کی قرارداد منظور، اسرائیل کا ماننے سے انکار

نیویارک: اسرائیلی حملوں کے 40 روز بعد سلامتی کونسل نے غزہ جنگ میں انسانی بنیاد پر وقفے کی قرارداد منظور کرلی۔ اسرائیل نے قرارداد مسترد کردی۔ سلامتی کونسل میں مالٹا کی جانب سے پیش کی گئی قرارداد کے حق میں 12 ووٹ آئے۔ امریکا، برطانیہ اور روس نے ووٹنگ میں حصہ نہیں لیا۔ قرارداد میں فوری اور انسانی بنیادوں پر جنگ میں وقفے اور راہداریوں کا مطالبہ کیا گیا تاکہ محصور علاقے میں شہریوں تک امداد پہنچائی جا سکے۔ قرارداد میں یرغمالیوں کی فوری رہائی کا بھی مطالبہ کیا گیا ہے۔
اقوام متحدہ میں چین کے سفیر نے کہا کہ ہم سب گزشتہ 40 دنوں میں کونسل کے غیر فعال ہونے سے مایوس ہیں۔ اقوام متحدہ میں اسرائیلی سفیر گیلاد اردان کا کہنا ہے کہ یہ قرارداد حقیقت سے دور اور بے معنی ہے۔ اسرائیل بین الاقوامی قانون کے مطابق کام جاری رکھے گا۔ انہوں نے قرارداد میں حماس کے حملے کا ذکر نہ کرنے پر بھی تنقید کی۔ امریکی سفیر لنڈا تھامس گرین فیلڈ نے بھی اسرائیل کا ساتھ دیا اور کہا کہ وہ خوف زدہ ہیں کہ کونسل کے چند ارکان اب بھی وحشیانہ حملے کی مذمت کے لیے خود کو سامنے نہیں لا سکتے جو حماس نے اسرائیل کے خلاف کیا۔