Raza Musani 
کابل: غیر قانونی افغان مہاجرین کی بیدخلی پر پاکستان اور افغانستان کے درمیان اختلافات شدت اختیار کرگئے۔ افغان ترجمان ذبیح اللہ مجاہد نے پاکستان سے افغان مہاجرین کی بیدخلی پر سخت ردعمل کا اظہار کرتے ہوئے کہاہے کہ اس اقدام سے بداعتمادی میں اضافہ ہوا ہے۔ انہوں نے کہا کہ مہاجرین کی بیدخلی دوطرفہ معاملہ ہے جسے یک طرفہ طور پر انجام دیا جارہا ہے، اس اقدام سے افغانوں میں پاکستان مخالف جذبات بڑھ رہے ہیں انہوں نے ان الزامات کی بھی سختی سے تردید کی کہ افغانستان میں دہشت گردوں کی محفوظ پناہ گاہیں موجود ہیں جو پاکستان میں دہشت گردی کررہے ہیں ۔انہوں نے خبردار کیا کہ پاکستان میں قانونی طور پر رہائش پذیر افغانوں کو بیدخل نہ کیا جائے۔ انہوں نے کہا کہ پاکستان کو اپنی اندرونی سیکورٹی میں ناکامی کا الزام دوسروں پر نہیں ڈالنا چاہیے۔ ہم جس طرح افغانستان میں امن و استحکام چاہتے ہیں ایسے ہی پاکستان میں بھی امن چاہتے ہیں۔
