ہندوستان میں مساجد اور مدارس کیخلاف نئی مہم شروع

نئی دہلی : ہندوستانی دارالحکومت نئی دہلی میں گزشتہ ہفتے دھماکے کے بعد ملک بھر میں مساجد اور مدارس کیخلاف نئی مہم شروع کردی گئی ہے۔
اترپردیش میں انسداد دہشت گردی اسکواڈ اے ٹی ایس نے دہلی دھماکے کی تحقیقات کے سلسلے میں پرایاگ راج زون کے آٹھ اضلاع کی مدارس کا تفصیلی ریکارڈ طلب کرلیا۔ مدارس کے طلبہ، اساتذہ اور علماء کے نام، رابطے اور دیگر تفصیلات مانگی گئی ہیں۔ اب تک دو سو چھ مدارس کی معلومات اے ٹی ایس کو ارسال کر دی گئی ہیں، جن میں 43 سرکاری امدادی اور 169 نجی مدارس شامل ہیں۔ اے ٹی ایس کا کہنا ہے کہ یہ محض احتیاطی اقدام ہے تاکہ مذہبی مدارس کا غلط استعمال کرنے والے انتہاپسند عناصر کا پتہ لگایا جا سکے۔ ابتدائی ڈیٹا کے بعد زمینی سطح پر تصدیق کی جائے گی تاکہ ممکنہ خطرات کا جائزہ لیا جا سکے۔ یہ ہدایت صرف متعلقہ آٹھ اضلاع پر لاگو ہے اور ریاستی پالیسی کی عکاسی نہیں کرتی۔