رسول اللہ (ص) کی سیرت پر عمل پیرا ہو کر ہی کوئی قوم کامیاب ہوسکتی ہے، عمران خان

جہلم : وزیراعظم عمران خان نے کہا ہے کہ اجتہاد کا راستہ ترک کرنے سے مسلمان زوال کا شکار ہوگئے۔ رسول اللہ(ص) دنیا کے عظیم لیڈر تھے ان ہی کی سیرت پرچلنے میں کامیابی ہے اور جو لوگ رسول اللہ کی راہ پرچلتے ہیں وہ آگے جاتے ہیں۔ مغرب آج سیرت نبی(ص) پر ریسرچ کررہا ہے کیونکہ وہاں فتویٰ لگ جانے کا ڈر نہیں ہے۔ جہلم میں القادر یونیورسٹی کی تقریب سے خطاب میں عمران خان نے کہا کہ ترقی کے لیے ریاست مدینہ کےاصولوں پر عمل کرنا ہوگا۔ سیرت النبی پر عمل کے بغیر ہم کسی مقام کو حاصل نہیں کرسکتے۔ ہمارا تعلیمی نظام ہی ہماری کامیابی میں آڑے آگیا۔ طبقاتی تعلیمی نظام سے مسائل نے جنم لیا، تعلیمی نظام میں یکسانیت ضروری ہے ، یکساں نظام تعلیم سے غریب کو فائدہ ہوگا۔ بدقسمتی سےکلونیل ازم کی وجہ سے مسلمان دنیا میں ذہنی غلام ہیں۔ مغربی کلچر ہماری تباہی کی بڑی وجہ ہے۔ عظیم قوم بننے کے لیے عظیم کردار چاہیے، سچا اور انصاف کرنے والا ہی بڑا لیڈر بن سکتا ہے، ایماندار شخص بہت سی پابندیوں سے آزاد ہوتا ہے۔ انہوں نے کہا کہ مغربی ثقافت روحانی طور پر زوال پذیر ہورہی ہے ،مغرب میں چرچز بند ہورہے ہیں ،نوجوانوں کی رہنمائی نہیں کی جارہی۔ موبائل فون انقلاب ضرور لایا لیکن اخلاقی طور پر نوجوانواں کو کمزورکرنے میں کردار اداکررہا ہے،بچوں اورنوجوانوں کی سرگرمیوں کی نگرانی لازمی ہے۔