عراق میں امریکی ایئربیس پر بڑا حملہ، متعدد امریکی و عراقی فوجی زخمی

بغداد : عراق میں مزاحمت کاروں کے امریکی فوجی اڈے پر حملے میں متعدد امریکی اور عراقی فوجی زخمی ہو گئے۔امریکی سینٹرل کمانڈ کے مطابق عراق کے صوبہ الانبار میں عین الاسد ایئربیس کو کئی بیلسٹک میزائلوں اور راکٹوں سےنشانہ بنایا گیا۔ یہ چند گھنٹوں میں دوسرا حملہ ہے۔ اڈے پر 20 سے زیادہ میزائل داغے گئے۔ سینٹ کام کے مطابق بیشتر میزائلوں کو تباہ کردیا گیا۔ جبکہ بعض میزائل اڈے پر گرنے سے نقصان پہنچا جس کا جائزہ لیا جارہا ہے۔ اڈے پر موجود دو امریکی معمولی زخمی ہوئے۔ جبکہ درجنوں کو ذہنی چوٹیں آئیں۔ کئی عراقی فوجی بھی شدید زخمی ہوئے۔ غزہ جنگ شروع ہونے کے بعد امریکی افواج اور بین الاقوامی اتحادی افواج کے مراکز پر میزائلوں اور ڈرونز سے سینکڑوں حملے کیے گئے ہیں۔ امریکا نے 7 اکتوبر سے عراق اور شام میں اپنی افواج کے خلاف 106 سے زیادہ حملوں کا اعتراف کیا ہے۔