ایران کے تازہ میزائل حملے، تل ابیب میں عمارت میں آگ بھڑک اٹھی

تہران: ایران نے صبح سویرے اسرائیل پر تازہ میزائل حملے کئے ہیں۔ حملوں میں تل ابیب اور حیفہ میں اہم تنصیبات کو نشانہ بنایا گیا۔ ایران فوج نے آج صبح اسرائیل پر پانچ بیلسٹک میزائل فائر کئے۔ ایک میزائل تل ابیب میں سرکاری عمارت پر لگا جس سے خوفناک آگ بھڑک اٹھی۔ ایرانی پاسداران انقلاب نے صیہونی فوجی مراکز، دو فضائی اڈے، دفاعی صنعتیں اور کمانڈ اینڈ کنٹرول مراکز کو نشانہ بنانے کا دعویٰ کیا ہے۔ ایران سے فائر کیے گئے میزائل وسطی اسرائیل کے علاقے ڈین گش میں بھی گرے۔ صیہونی فوج نے دعویٰ کیا کہ اس کے فضائی دفاعی نظام نے تل ابیب کی طرف آنے والے تمام میزائلوں کو ہوا میں تباہ کردیا۔
ادھر اسرائیلی فوج نے ایران کے شہر اصفہان میں ایٹمی مرکز کو حملے کا نشانہ بنایا۔ جبکہ قم میں بھی ایک عمارت پر حملہ کیا گیا۔ اسرائیلی کارروائی میں ایک بچے سمیت دو افراد شہید اور کئی زخمی ہوگئے۔