Raza Musani 
غزہ: صیہونی فوج نے غزہ چوبیس گھنٹوں کے دوران فضائی اور زمینی حملوں میں امداد کے منتظر اکتالیس افراد سمیت مزید ترانوے فلسطینی شہید اور درجنوں زخمی کردئے۔ جبکہ بھوک کی شدت سے مزید چار افراد زندگی کی بازی ہارگئے۔
صیہونی فوج کے غزہ جنگ میں وقفے کے باوجود وحشیانہ کارروائیوں میں کوئی کمی نہیں آسکی۔ صیہونی فوجیوں نے رفح میں امدادی مراکز کے اطراف ہجوم پر گولیاں چلائیں جس کے نتیجے میں تیس فلسطینی شہید ہوگئے۔ غزہ سٹی میں بھی امداد مرکز جانیوالے بھوکے فلسطینیوں پر گولیاں برسائی گئیں جس کے نتیجے میں گیارہ فلسطینی شہید ہوگئے۔
ادھر بھوک کی شدت سے دو بچوں سمیت مزید چار افراد زندگی کی بازی ہارگئے۔ اسرائیل نے غزہ میں روزانہ سو ٹرک لے جانے کی اجازت دی ہے اس کے باوجود ٹرکوں کو روکا جارہا ہے اور نہایت قلیل تعداد میں ٹرک جانے کی اجازت دی جارہی ہے۔
