Raza Musani 
غزہ: صیہونی فوج نے رفح پر زمینی کارروائی سے پہلے فضائی حملے بڑھادئے۔ چوبیس گھنٹوں میں نہتے خواتین و بچوں سمیت مزید بانوے فلسطینی شہید ہوگئے۔ غزہ میں صیہونی فوج کی انسانیت سوزی 141 ویں دن بھی جاری ہے۔ صیہونی فوج نے رات بھر غزہ کے مختلف مقامات پر حملے جاری رکھے۔ بیت لاہیہ پر حملے میں تیس افراد شہید ہوئے۔ شاطی پناہ گزین کیمپ کو بھی جنگی طیاروں نے نشانہ بنایا۔ جہاں کئی اموات ہوئی ہیں۔ صبح سویرے مرکزی رفح میں اپارٹمنٹ پر حملہ کیا گیا جس میں 8 فلسطینی شہید ہوئے۔ مشرقی رفح میں بھی رہائشی عمارت پر حملہ کیا گیا۔ جس سے سات فلسطینی شہید ہوئے۔ شمالی غزہ میں حماس سے لڑائی کے دوران ایک اور اسرائیلی فوجی افسر مارا گیا۔ زمینی آپریشن کے دوران اب تک 238 اسرائیلی فوجی مارے جا چکے ہیں۔ وزارت صحت کے مطابق صیہونی فوج نے چوبیس گھنٹوں میں 8 مقامات پر قتل عام کیا جس میں بانوے فلسطینی شہید ہوئے۔ سات اکتوبر سے جاری صیہونی حملوں میں شہدا کی تعداد تیس ہزار تک جاپہنچی ہے۔جبکہ ستر ہزار کے قریب افراد زخمی ہیں۔
