افغانستان میں 5 لاکھ امریکی ہتھیار فروخت کردئے گئے، رپورٹ

کابل : بی بی سی نے دعویٰ کیا ہے کہ افغانستان میں طالبان کو دئےگئے پانچ لاکھ ہتھیار ضائع ہو چکے ہیں۔ انہیں فروخت یا عسکریت پسند گروہوں کو اسمگل کیا جا چکا ہے۔ ایک سابق افغان اہلکار نے نام ظاہر نہ کرنے کی شرط پر بی بی سی کو بتایا کہ طالبان نے 2021 میں افغانستان پر دوبارہ کنٹرول حاصل کرنے کے بعد تقریباً 10 لاکھ ہتھیاروں اور فوجی سازوسامان کا کنٹرول سنبھال لیا تھا۔ رپورٹ کے مطابق گزشتہ سال سلامتی کونسل کی پابندیوں کی کمیٹی کے بند کمرہ اجلاس میں طالبان نے اعتراف کیا تھا کہ دس لاکھ میں سے کم از کم آدھے آلات وہتھیار اب غائب ہوچکے ہیں۔ کمیٹی کے رکن نے کہا کہ انہوں نے دیگر ذرائع سے تصدیق کی ہے کہ 5 لاکھ اشیا کا علم نہیں ہے۔ فروری میں اقوام متحدہ نے ایک رپورٹ میں کہا تھا کہ تحریک طالبان پاکستان، اسلامک موؤمنٹ آف ازبکستان، ایسٹ ترکستان اسلامک موؤمنٹ اور یمن کی انصار اللہ اور القاعدہ سے وابستہ تنظیمیں طالبان کے قبضے میں لیے گئے ہتھیاروں تک رسائی حاصل کر رہی ہیں یا انہیں بلیک مارکیٹ سے خرید رہی ہیں۔