Raza Musani 
غزہ : حماس اور اسرائیل کے درمیان قیدیوں کے چوتھے تبادلے کے تحت حماس نے تین اسرائیلیوں کو رہا کردیا۔ یرغمالیوں کی رہائی کے معاہدے کے تحت حماس نے 2 اسرائیلی یرغمالیوں کو خان یونس میں ریڈ کراس کے سپرد کیا۔
میڈیا رپورٹس میں بتایا گیا ہے کہ حماس کی جانب سے 2 اسرائیلی یرغمالیوں اوفر کالدرون اور یارڈن بیباس کو رہا کیا گیا جبکہ تیسرے یرغمالی کیتھ سیگل کو غزہ سٹی میں ریڈ کراس کے حوالے کیا گیا۔
فلسطینی قیدیوں کی سوسائٹی نے کہا ہے کہ غزہ میں قیدیوں کے چوتھے تبادلے میں 183 فلسطینی اسیران کو اسرائیلی جیلوں سے آزاد کر دیا جائے گا۔
حماس کے مسلح ونگ القسام بریگیڈز کے سینکڑوں نقاب پوش جنگجوؤں نے سیکورٹی کی ذمہ داری سنبھال رکھی تھی۔ دستخطی تقریب کیلئے ایک اسٹیج بنایا گیا تھا۔ اسیروں کی حوالگی کے بعد ریڈ کراس کی گاڑیاں انہیں لیکر چلی گئیں۔
