Raza Musani 
واشنگٹن: تین امریکی ارکان کانگریس نے ہندوستانی وزیراعظم نریندر مودی کے خطاب کے بائیکاٹ کا اعلان کردیا۔ ہندوستان میں اقلیتوں کیخلاف مظالم اور انسانی حقوق کی خلاف ورزیوں کے باعث ہندوستانی وزیراعظم نریندر مودی کے دورہ امریکا پر شدید تنقید کی جارہی ہے۔ گذشتہ روز کانگریس کے 75 ارکان نے صدر جوبائیڈن کو خط لکھ کر ہندوستانی وزیراعظم مودی سے ملاقات میں انسانی حقوق کا معاملہ اٹھانے پر زور دیا تھا۔ ادھر تین ارکان کانگریس نے اعلان کیا ہے کہ وہ کانگریس سے مودی کے خطاب کا بائیکاٹ کریں گے۔ بائیکاٹ کا اعلان کرنیوالوں میں الہان عمر۔ راشدہ طلیب اور جیمی راسکن شامل ہیں۔ راشدہ طلیب نے ٹوئٹ کیا کہ مودی کی انسانی حقوق کی خلاف ورزیوں، جمہوریت مخالف اقدامات، مذہبی اقلیتوں کو نشانہ بنانے اور صحافیوں کو سنسر کرنے کی طویل تاریخ کے باوجود انہیں کانگریس سے خطاب کی دعوت دینا شرمناک ہے۔ اُدھر امریکی انڈینز آرگنائزیشنز نے کہا ہےکہ مودی سے گفتگو میں انسانی حقوق کی حقیقت اور مذہبی آزادی کے حالات کو بھی شامل کیا جائے۔
