Raza Musani 
کراکس: ایران اور ونیزویلا نے 19 سمجھوتوں پر دستخط اور تجارت کو بیس ارب ڈالر تک بڑھانے پر اتفاق کیا ہے۔ ایرانی صدر آیت اللہ رئیسی گذشتہ روز ونیزویلا کے دارالحکومت کراکس پہنچے تو صدر نکولس مادورو نے اپنے ایرانی ہم منصب کا پرتپاک استقبال کیا۔ اس موقع پر زندگی کے مختلف طبقوں سے تعلق رکھنے والے لوگ بھی موجود تھے۔ بعد میں دونوں صدور نے ون آن ون ملاقات کی اور دونوں ممالک کے اعلی وفود کے درمیان اعلی سطحی مذاکرات ہوئے۔ صدر رئیسی نے سیمون بولیوار کے مقبرے پر حاضر ہو کر پھول چڑھائے۔
دورے کے دوران دونوں ملکوں کے درمیان باہمی تعاون کی 19 مفاہمتی یادداشتوں پر دستخط کیے گئے۔ دونوں صدور نے ملاقات کے بعد مشترکہ نیوز کانفرنس میں بتایا کہ انہوں نے تجارت کو بیس ارب ڈالر تک لے جانے پر اتفاق کیا ہے تجارتی تبادلوں کا حجم پہلے مرحلے میں 10 ارب ڈالر تک بڑھایا جائے گا جسے دوسرے مرحلے میں 20 ارب ڈالر تک بڑھایا جا سکتا ہے۔ صدر رئیسی نے کہاکہ کراکس کے ساتھ تہران کے عام سفارتی نوعیت کے تعلقات نہیں ہیں بلکہ اسٹریٹجک نوعیت کے ہیں۔ مشترکہ مفادات، پوزیشنوں اور دشمنوں کے ہونے سے دونوں ممالک کے درمیان تعاون کو گہرا کرنے اور اسے اسٹریٹجک بنانے میں مدد ملی ہے۔
