غزہ میں اسرائیلی فوج کے حملوں میں 145 فلسطینی شہید

غزہ : شمالی غزہ میں اسرائیلی فوج نے امداد کے منتظر فلسطینیوں پر ایک بار پھر گولیاں برسادیں۔ اسرائیلی فوج نے کویت راؤنڈ اباؤٹ کے مقام پر اقوام متحدہ کی امداد کے منتظر تیس افراد کو شہید اور متعدد کو زخمی کردیا۔ عالمی دباؤ کے باوجود اسرائیلی فضائیہ نے جنوبی اور سینٹرل رفح میں فضائی حملے کئے جس میں پچاس فلسطینی شہید ہوگئے۔ حملے میں متعدد عمارتوں کو نقصان پہنچا ہے۔ النصیرات کیمپ پر حملے میں شہادتیں چالیس سے بڑھ گئیں۔ اسرائیلی فوج کے شمالی اور سینٹرل غزہ پر بھی حملے جاری ہیں۔ چوبیس گھنٹوں میں 145 فلسطینی شہید ہوئے۔ جس کے بعد شہادتوں کی مجموعی تعداد بتیس ہزارتک پہنچ گئی ہے۔ حماس نے الشفا اسپتال میں اپنے 90 مزاحمت کاروں کی شہادت کا دعویٰ مسترد کردیا۔ القسام بریگیڈ نے خان یونس میں فوجی گاڑی پر راکٹ سے حملہ کیا جس میں کئی فوجی ہلاک وزخمی ہوگئے۔ادھر عالمی ادارے کی رپورٹ کے مطابق غزہ میں پیدا ہونے والے دس میں سے چھ بچے غذائی قلت کے باعث دم توڑ رہے ہیں۔