غزہ جنگ میں 13 ہزار بچے شہید، 25 ہزار سے زائد زخمی ہوئے، اقوام متحدہ

نیویارک : اقوام متحدہ کے اداروں کے مطابق غزہ میں جنگ بچوں کے لیے تباہ کن رہی ہے۔ 13 ہزار سے زیادہ بچے شہید اور پچیس ہزار سے زائد زخمی ہوئے.
اقوام متحدہ کے رابطہ دفتر برائے انسانی امور نے رپورٹ کیاکہ جمعرات تک غزہ میں 40,717 فلسطینی لاشوں کی شناخت کی گئی ہے، جن میں سے ایک تہائی یعنی 13,319 بچے تھے۔ یونیسیف نے کہا کہ غزہ کی وزارت صحت کے ساتھ مل کر اکٹھی کی گئی معلومات کی بنیاد پر 25 ہزار بچوں کے زخمی ہونے کا تخمینہ لگایا گیا ہے۔ہزاروں بچے یتیم یا اپنے والدین سے جدا بھی ہوئے۔ اقوام متحدہ کی ڈپٹی سیکریٹری جنرل امینہ محمد نے کہا کہ دسمبر سے پہلے کے چار ماہ میں 19 ہزار بچے شدید غذائی قلت کے باعث اسپتال میں داخل ہوئے تھے۔
گلوبل فنڈ ایجوکیشن ’کین ناٹ ویٹ‘ کی ایگزیکٹیو ڈائریکٹر یاسمین شریف نے بتایا کہ اسکول جانے کی عمر کے ساڑھے چھ لاکھ بچے تعلیم سے محروم ہیں غزہ کے پورے تعلیمی نظام کو دوبارہ تعمیر کرنا ہوگا۔