یمنی عوام نے دارالحکومت صنعا سمیت ملک کے دیگر 20 شہروں میں قومی استقامت کے دن کے موقع پر زبردست احتجاجی مظاہرے کر کے یمن کے خلاف عرب اتحاد کی جارحیت کی شدید مذمت کی۔
المسیرہ کی رپورٹ کے مطابق یمنی عوام نے صعدہ ، صنعا اور الحدیدہ سمیت تقریباً 20 شہروں میں ہونے والے احتجاجی مظاہروں میں امریکہ، سعودی عرب اور اس کے اتحادیوں کے خلاف فلک شگاف نعرے لگائے۔ مظاہرین نے یمن پر عرب اتحاد کی جاری جارحیت کی مذمت کرتے ہوئے یمن کی فوج اور عوامی فورسز کی حمایت کا اعلان کیا اور جارحین کے انخلا پر تاکید کی۔ یمن کی تحریک انصار اللہ کے سربراہ اور انقلاب یمن کے رہنما سید عبدالملک بدرالدین الحوثی نے اپنے ملک کے خلاف جارحیت کو 6 برس مکمل ہونے پر قوم سے خطاب کیا۔ انہوں نے اپنے خطاب کے آغاز میں، عوام کا شکریہ ادا کیا اور دشمن کی جارحیت کے مقابلے میں ان کی استقامت کی قدردانی کی۔ انہوں نے کہا کہ 6 سال قبل آدھی رات کو آغاز ہونے والی جارحیت ایک جرم اور غداری تھی۔ ماضی کے سمجھوتوں کے تحت یمن اور اس کے ہمسائے کے درمیان حالات پرامن تھے اور یمن کی جانب سے کوئی ایسا قدم نہیں اٹھایا گیا کہ اس ملک کے خلاف جارحیت میں متحدہ عرب امارات کی مشارکت کا جواز بن سکے۔
