Raza Musani 
واشنگٹن : امریکا نے عالمی انسانی حقوق پر سالانہ رپورٹ میں کہا ہے کہ ہندوستان میں مذہبی بنیادوں پر پُرتشدد کارروائیاں کی گئیں۔ امریکی وزیر خارجہ انٹونی بلنکن کی طرف سے جاری رپورٹ میں ماورائے عدالت قتل، تشدد یا ظلم، غیر انسانی سلوک ، پولیس اور جیل حکام کی طرف سے ذلت آمیز سلوک یا سزا اور جیلوں کے سخت اور جان لیوا حالات کا ذکر کیا گیا ہے۔ رپورٹ کے مطابق آزادی صحافت اور مذہبی اور نسلی اقلیتوں کو نشانہ بنایا گیا۔ صحافیوں اور سیاسی مخالفین کی جبری گرفتاریوں کے واقعات ہوئے۔ رپورٹ میں مزید کہا گیا کہ حکومت مبینہ طور پر مسلم کمیونٹی کی تنقیدی آوازوں کو نشانہ بنا رہی ہے اور ان کے گھروں اور کاروبار کو تباہ کرنے کے لیے بلڈوزر کا استعمال کر رہی ہے۔ ہندوستان ماضی میں ایسی ہی رپورٹس کو مسترد کر چکا ہے۔ مرکزی حکومت نے زور دے کر کہا ہے کہ ہندوستان نے سب کے حقوق کے تحفظ کے لیے جمہوری طرز عمل اور مضبوط ادارے قائم کیے ہیں۔ رپورٹ میں ایران، چین، میانمار ، افغانستان، جنوبی سوڈان، شام اور دیگر ممالک میں انسانی حقوق کی خلاف ورزیوں کے بارے میں تشویش کو بھی اجاگر کیا گیا ہے۔
