Ilyas 
جو سیاسی جماعتیں آئینی صوبہ کی مخالفت کر رہی ہیں عوام ووٹ کی طاقت سے انہیں منہ توڑ جواب دینگے،عوام مداریوں اور لٹیروں کے دھوکے میں نہیں آئیں گے
تحریک انصاف کے ساتھ مل کر حکومت بنائیں گے اور عوام کی محرومیوں کے خاتمے کے لیے تمام تر وسائل کو بروئے کار لایا جائے گا،کھرمنگ میں جلسے سے خطاب
گلگت (نیوز ڈیسک)مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ جو سیاسی جماعتیں جی بی کے آئینی صوبہ بننے کی مخالفت کر رہی ہیں خطے کے عوام ووٹ کی طاقت سے انہیں منہ توڑ جواب دیں گے، یہاں کے باشعور عوام مداریوں اور لٹیروں کے دھوکے میں نہیں آئیں گے، کھرمنگ حلقہ 5 میں ایم ڈبلیو ایم کے حمایت یافتہ اور تحریک انصاف کے امیدوار امجد عباس زیدی کے انتخابی جلسے سے خطاب میں علامہ راجہ ناصر عباس نے کہا کہ خطے کے عوام کی جدید طبی، تعلیمی اور دیگر سہولیات کے حصول تک چین سے نہیں بیٹھیں گے، جی بی کے حقوق کیلئے آخری دم تک جدوجہد جاری رہے گی، تحریک انصاف کے ساتھ انتخابی اتحاد کا مقصد خطے کی ترقی و استحکام میں اپنا کردار ادا کرنا ہے، گلگت بلتستان کو آئینی صوبے کی حیثیت حاصل ہونے سے یہاں کے عوام کی تقدیر بدل جائے گی ،انہوں نے کہا کہ مجلس وحدت مسلمین زبانی دعووَں کے بجائے عملی جدوجہد پر یقین رکھتی ہے،کسی بھی سنگین صورتحال اور اہم ایشوز پر میدان عمل میں ہماری موجودگی ہمارے اس دعوے کی تائید میں دلیل ہے،تحریک انصاف کے ساتھ مل کر حکومت بنائیں گے اور عوام کی محرومیوں کے خاتمے کے لیے تمام تر وسائل کو بروئے کار لایا جائے گا ،جلسے سے وفاقی وزیر علی امین گنڈا پور، ایم ڈبلیو ایم کے مرکزی سیکرٹری سیاسیات سید اسد نقوی، علامہ اعجاز بہشتی، شیخ اکبر رجائی اور علی احمد نوری سمیت متعدد مذہبی و سیاسی شخصیات نے خطاب کیا۔
