پاکستان میں حالات خراب ہوئے تو پورے خطے پر برے اثرات پڑیں گے، علامہ ناصر عباس جعفری

مشہد: مجلس وحدت مسلمین پاکستان کے سربراہ علامہ راجہ ناصر عباس جعفری نے دورہ ایران کے دوران مجلس وحدت مسلمین کے مشہد مقدس میں دفتر موسسہ شہید عارف الحسینی کا دورہ کیا، اس موقع پر خصوصی نشست کا اہتمام کیا گیا، علامہ راجہ ناصر عباس جعفری نے طلاب سے خطاب میں کہا کہ امریکا اور ان کے اتحادی اسلامی انقلاب کو ختم کرنے پہ تلے ہوئے ہیں، یقیناً اس دور میں انقلاب کا آگے بڑھنا معجزہ سے کم نہیں اس انقلاب کے لئے بہت سی عظیم شخصیات نے اپنا خون دیا، وہ اگر اس دور میں ہوتے تو یقیناً عظیم رہبران میں سے ہوتے، امریکی لابی نہ صرف ایران بلکہ شام، لیبیا اور عراق کو بھی تقسیم کرنا چاہتی ہے، آج اگر یہ سب اس کے شر سے بچے ہوئے ہیں تو یہ اس الہی قیادت کی برکت سے ہیں، علامہ راجہ ناصر عباس جعفری نے کہا کہ پاکستان کا محل وقوع بہت ہی اہمیت کا حامل ہے، امریکا اور اس کے حواری پاکستان میں حالات خراب کرنے کی بھرپور کوشش کر رہے ہیں،اگر خدانخواستہ پاکستان میں حالات خراب ہوئے تو پورے ریجن میں اس کے برے اثرات پڑیں گے، ہم پاکستان کا درد رکھنے والوں کے ساتھ مل کر دشمن کو کبھی کامیاب نہیں ہونے دیں گے، قائد وحدت نے افغانستان کی صورتحال پر بات کرتے ہوئے کہا کہ اگر افغانستان میں حالات مزید خراب ہوتے ہیں تو پڑوسی ممالک پر اس کے بہت برے اثرات پڑیں گے، ان کا مزید کہنا تھا کہ اس وقت پاکستانیوں کو اختلافات بھلا کر متحد ہونے کی ضروت ہے۔