علامہ نیاز نقوی کی رحلت قومی نقصان ہے، شفقت محمود

لاہور ( پ ر ) وفاق المدارس الشیعہ پاکستان کے نائب صدر علامہ قاضی نیاز حسین نقوی کے انتقال پر مختلف سیاسی، مذہبی اورسماجی شخصیات کی جانب سے تعزیت کا سلسلہ جاری ہے۔ وفاقی وزیر تعلیم شفقت محمود نے جامعتہ المنتظرمیں رئیس الوفاق المدارس آیت اللہ حافظ سید ریاض حسین نجفی سے مرحوم کے انتقال پر اظہار افسوس کیا اورممتاز عالم دین کی رحلت کو قومی نقصان قراردیا، انہوںنے کہا کہ اتحاد تنظیمات مدارس کے اجلاسوں میں علامہ نیاز نقوی سے بہت رابطہ رہا۔ وہ اتحادامت کے داعی اور پاکستانی مفاد کومقدم رکھنے والی شخصیت تھے، نائب امیر جماعت اسلامی اور ملی یکجہتی کونسل کے سیکریٹری جنرل لیاقت بلوچ نے بھی ملاقات میں تعزیت کی اور مہمانوں کی کتاب میں تاثرات درج کئے۔علامہ سید ساجد علی نقوی،علامہ راجہ ناصر عباس جعفری، مولانا جواد نقوی، اورمختلف علمائے کرام نے بھی اظہار تعزیت کیا ہے، مرجع عالی قدرآیت اللہ سید علی سیستانی، حافظ بشیر حسین نجفی، ایرانی چیف جسٹس آیت اللہ ابراہیم رئیسی ،سید حسن خمینی ،مولانا یاسین ظفر، مولانا مفتی منیب الرحمان، مولانا حنیف جالندھری، اور دیگر نے بھی علامہ نیاز نقوی کی رحلت پر تعزیت کااظہارکیا ہے۔