عراقی میں غیر قانونی طور پر موجود امریکی فوج کے لاجسٹک قافلوں پر حملوں کا سلسلہ جاری ہے۔ دارلحکومت بغداد سمیت ملک میں موجود امریکی فوج کے 2 لاجسٹک قافلوں کو بم حملوں کا نشانہ بنایا گیا ہے جس سے متعدد امریکی گاڑیاں حساس فوجی سازوسامان سمیت تباہ ہو گئیں۔ عراقی نیوز چینل الصابرین کے مطابق عراق کے جنوب میں واقع کویتی سرحد کے قریب واقع "جریشان” نامی گذرگاہ کے نزدیک پہلا امریکی فوجی قافلہ سڑک کنارے نصب بم سے ٹکرا گیا جبکہ اس حملے میں کوئی جانی نقصان نہیں ہوا تاہم کسی مسلح گروپ نے تاحال اس حملے کی ذمہ داری قبول نہیں کی۔ علاوہ ازیں امریکی فوج کا دوسرا لاجسٹک قافلہ دارالحکومت بغداد کے جنوبی علاقے "الیوسفیہ” میں بم حملے کا شکار بنا ہے۔
گزشتہ روز بھی 3 امریکی فوجی کانوائے کے راستوں میں دھماکے ہوئے تھے۔ عراق میں امریکی افواج پر حملے روز کا معمول بنتے جا رہے ہیں۔
واضح رہے کہ عراق کی پارلیمنٹ نے پانچ جنوری 2020 کو عراق سے امریکہ افواج کے انخلا کی حمایت میں ایک بل کی منظوری دی تھی۔
