طویل روزہ گرین لینڈ اور سب سے مختصر نیوزی لینڈ میں ہوگا

کراچی: رواں سال ماہ رمضان میں سب سے طویل روزہ گرین لینڈ اور سب سے مختصر نیوزی لینڈ میں ہوگا۔ پوری دنیا میں رمضان المبارک کا آغاز ہونے جارہا ہے جس میں مسلمان روزہ کی عبادت انجام دیتے ہیں۔ اس سال انتہائی جنوبی ممالک جیسے چلی یا نیوزی لینڈ میں رہنے والے مسلمان اوسطاً 12 گھنٹے کا روزہ رکھیں گے جب کہ شمالی ممالک جیسے آئس لینڈ یا گرین لینڈ میں رہنے والے مسلمان 17 گھنٹے سے زیادہ کے روزے رکھیں گے۔ سب سے طویل روزہ گرین لینڈ اور آئس لینڈ میں 18 گھنٹے 12 منٹ کا ہوگا۔ فن لینڈ میں 17 گھنٹے 48 منٹ کا روزہ ہوگا۔ سب سے مختصر روزہ نیوزی لینڈ میں 12 گھنٹے 17 منٹ کا ہوگا۔ برسلز اور لندن میں مسلمان 16 گھنٹے روزہ رکھیں گے۔
مسلم ممالک میں سب سے طویل روزہ قازقستان میں 16 گھنٹے کا ہوگا۔ جبکہ سب سے مختصر انڈونیشیا میں 13 گھنٹے کا ہوگا۔ ترکی ۔ پاکستان ۔ ہندوستان۔ افغانستان اور ایران میں مسلمان تقریباً 14 گھنٹے کا روزہ رکھیں گے۔