شام میں ایک بار پھر کیمیکل حملوں کا ڈرامہ رچانے کی تیاری، روس کا انتباہ

شام میں سرگرم دہشت گرد گروہوں کی جانب سے کیمیکل حملے کی سازش پر مبنی روس کے انتباہ کے بعد عالمی میڈیا کی توجہ شام اور عراق کے سرحدی علاقوں پر مرکوز ہے۔
شام کے تجزیہ نگار عروہ ساتر کا کہنا ہے کہ یہ ڈرامہ ایک بار پھر وائٹ ہیلمٹ نامی دہشت گرد گروہ انجام دے سکتا ہے اسی لئے ذرائع ابلاغ نے اپنی توجہ سرحدی علاقوں کی جانب مرکوز کر دی ہے۔ ان کا کہنا تھا کہ روس نے جو انکشاف کیا ہے اس سے پتہ چلتا ہے کہ امریکا اور مغربی ممالک ایک بار پھر شامی اور عراقی فوج کو بدنام کرنے کی سازش کر رہے ہیں۔
ان کا کہنا تھا کہ ادلب میں جس دھماکے کا انتظار کیا جا رہا ہے، اس کی ویڈیو ریکارڈنگ وائٹ ہیلمٹ دہشت گرد گروپ یقینی طور پر کرے گا کیونکہ اس کے پاس ویڈیو گرافنگ کے پیشرفتہ ساز و سامان موجود ہیں۔
واضح رہے کہ روس کی وزارت دفاع کے حمیمیم مرکز نے اعلان کیا ہے کہ صوبہ ادلب میں مسلح دہشت گرد گروہوں نے بڑی تعداد میں کلورین گیس اس صوبے میں منتقل کر دی ہے تاکہ کیمیکل حملے کا ڈرامہ کر سکیں۔ اس رپورٹ میں آیا ہے کہ دہشت گردوں نے کچھ باکسز جن میں ممکنہ طور پر کلورین گیس ہو سکتی ہے، علاقے میں منتقل کر دیئے ہیں تاکہ صوبہ ادلب میں کیمیکل حملے کا ڈرامہ کر سکیں۔
روسی وزارت دفاع اور شامی حکومت نے ملک میں سرگرم دہشت گرد گروہوں اور ان کے مغربی حامیوں کو ملک میں کیمیکل حملوں کا ڈرامہ کرنے اور اس کے الزامات شامی حکومت پر عائد کئے جانے کی بابت بارہا خبردار کیا ہے۔