کیپٹل ہل پر پرتشدد احتجاج کے بعد نومنتخب امریکی صدر جوبائیڈن کی حلف برداری کی تقریب کے موقع پر بھی مسلح احتجاج کا خدشہ ظاہر کیا جارہا ہے۔ ایف بی آئی نے خبردار کیا ہے کہ واشنگٹن سمیت امریکہ کی پچاس ریاستوں میں احتجاج ہو سکتا ہے۔ نومنتخب امریکی صدر 20 جنوری کو حلف اٹھائیں گے۔ جوبائیڈن کی حلف برداری کی تقریب سے قبل دس ہزار نیشنل گارڈز بھی تعینات کیے جائیں گے۔ موجودہ امریکی صدر ڈونلڈ ٹرمپ پہلے ہی کہہ چکے ہیں کہ وہ بائیڈن کی تقریب حلف برداری میں شرکت نہیں کریں گے۔
خیال رہے کہ بائیڈن کی کامیابی کی توثیق کیلئے بلائے گئے کانگرس کے اجلاس والے دن بھی امریکہ میں ہنگامے ہوئے تھے اور مشتعل مظاہرین نے پارلیمنٹ پر دھاوا بول دیا تھا۔ پولیس کے مطابق ہنگامہ آرائی میں4 افراد ہلاک ہوئے تھے اور متعدد مظاہرین کو گرفتار بھی کیا گیا۔ امریکی ایوان نمائندگان میں سیکیورٹی سخت اور امریکی نائب صدرمائیک پنس کو محفوظ مقام پرمنتقل کردیا گیا تھا۔ ہنگامہ آرائی کے سبب کانگریس کا اجلاس کچھ دیر کیلئے روک دیا گیا تھا تاہم بعد ازاں حالات کنٹرول کرنے کے بعد بائیڈن کی الیکشن2020 میں فتح کی توثیق کی گئی۔
