یوکرین جنگ، باخموت میں شدید لڑائی جاری

ماسکو : باخموت کے محاذ پر شدید لڑائی کے دوران یوکرین نے روس کے پانچ سو سے زائد فوجیوں کو ہلاک اور زخمی کرنے کا دعویٰ کردیا۔ یوکرین کے مشرقی ڈونباس خطے میں واقع باخموت شہر کا کنٹرول حاصل کرنے کے لیے شدید لڑائی ہورہی ہے۔دونوں جانب سے ایک دوسرے کو بھاری جانی نقصان پہنچانے کے دعویٰ کئے جارہے ہیں۔ یوکرینی افواج کے ترجمان نے بتایا کہ گزشتہ 24 گھنٹوں کے دوران روسی افواج نے 16 حملے کیے جبکہ باخموت شہر کے قریب 23 مختلف مقامات پر لڑائی ہو رہی ہے۔ جوابی کارروائی میں روسی فوج کو بھاری جانی نقصان پہنچایا گیا۔24 گھنٹوں کے دوران 221 روسی فوجی اور 314 زخمی ہوئے۔ یوکرین کے صدر ولادیمیر زیلنسکی کے ایک مشیر کا کہنا ہے کہ اُن کی افواج نے باخموت میں جنگ جاری رکھنے کا فیصلہ کیا ہے کیونکہ وہاں روسی افواج کی بہترین یونٹس کو بھاری نقصان پہنچ رہا ہے۔ ادھر روسی ویگنر گروپ نے باخموت کے مرکز کے قریب پہنچنے کا دعویٰ کردیا۔ گروپ کے سربراہ نے روس سے مزید گولہ بارود محاذ پر بھیجنے کا مطالبہ کیا ہے۔