Raza Musani 
لاہور: محکمہ اوقاف پنجاب نے شیعہ علما کے مطالبات 10 روز میں پورے کرنے اور تحفظات دور کرنے کی یقین دہانی کرادی، مجلس وحدت مسلمین پنجاب کے صوبائی سیکریٹری جنرل علامہ عبدالخالق اسدی کی زیر قیادت وفد کے ایڈیشنل سیکریٹری محکمہ اوقاف اطہر مسعود سے مذاکرات کامیاب رہے، یقین دہانی کی وجہ سے محکمہ اوقاف کے خلاف مظاہرہ ملتوی کردیا گیا، علامہ عبدالخالق اسدی نے علمائے کرام کے ہمراہ پریس کانفرنس سے خطاب میں کہا کہ شیعہ علماء کو درپیش خدشات دور کرنے کی یقین دہانی کی گئی ہے، خدشات دور نہ ہوئے تو یکم جولائی سے پنجاب بھر میں علمائے کرام سڑکوں پر ہونگے، ہم پاکستان کو ایک پر امن اور معتدل ریاست بنانا چاہتے ہیں. مذہبی رواداری اور اتحاد امت ہماری اولین ترجیح ہے لیکن اپنے عقائد پر کسی صورت سمجھوتہ نہیں کر سکتے، متحدہ علماء بورڈ میں شیعہ مکتب فکر کی نمائندگی برابری کی سطح پر دیکھنا چاہتے ہیں، جس کی یقین دہانی محکمہ اوقاف نے کی ہے، اب گیند حکومت کی کورٹ میں ہے کہ و ہ اس حساس مسئلے پہ کیا لائحہ عمل اختیار کرتے ہیں، ہم اپنے آئینی ، قانونی وجمہوری حقوق کے لئے ہر قسم کی آئینی و قانونی پر امن جدو جہد کے لئے آمادہ ہیں ۔
