گلگت بلتستان اسمبلی کی تین خواتین اراکین کو پارلیمانی سیکرٹریز بنانے کا فیصلہ کر لیا گیا ہے۔ سرکاری ذرائع کے مطابق وزیراعلیٰ خالد خورشید کی مشاورت کے بعد اسمبلی کی مخصوص نشستوں پر منتخب ہونے والی تحریک انصاف کی تینوں خواتین اراکین اسمبلی دلشاد بانو، کلثوم فرمان اور ثریا زمان کو پارلیمانی سیکریٹری بنانے کا فیصلہ کیا گیا ہے۔ ذرائع کے مطابق خاتون رکن اسمبلی دلشاد بانو کو پارلیمانی سیکریٹری برائے سیاحت، کلثوم فرمان کو پارلیمانی سیکریٹری برائے صحت اور رکن اسمبلی ثریا زمان کو پارلیمانی سیکریٹری برائے تعلیم بنایا جائے گا، نوٹیفکیشن ایک دو روز میں جاری ہوگا۔ یاد رہے کہ جی بی کابینہ میں ایک بھی خاتون ممبر موجود ہے۔ کابینہ میں خواتین کو نمائندگی نہ دینے پر تحریک انصاف کی صوبائی حکومت کو شدید تنقید کا نشانہ بنایا جا رہا تھا۔ اس تنقید کے سدباب کے طور پر مخصوص نشستوں پر منتخب ہونے والی تحریک انصاف کی تینوں خواتین اراکین اسمبلی کو پارلیمانی سیکریٹری بنانے کا فیصلہ کیا گیا ہے۔
