ترکیہ کا شام میں داعش کے سربراہ کو ہلاک کرنے کا دعویٰ

انقرہ: ترک صدر رجب طیب اردوان نے شام میں کارروائی کے دوران داعش کے سربراہ ابو الحسین القریشی کو ہلاک کرنے کا دعویٰ کردیا۔ ترکیہ کے صدر رجب طیب اردوان نے بتایا کہ اُن کی انٹیلی جنس فورسز نے داعش کے سربراہ کو شام میں آپریشن کے دوران ہلاک کردیا ہے۔ کارروائی شام کے علاقے جنداریس میں کی گئی۔ یہ علاقہ ترکیہ کے حمایت یافتہ باغی گروپ کے زیر کنٹرول ہے۔ قومی انٹیلی جنس ایجنسی کافی عرصے سے ابو الحسین الحسینی القریشی کا تعاقب کررہی تھی۔ جنداریس کے ایک رہائشی نے بتایا کہ ہفتہ اور اتوار کی درمیانی شب علاقے میں شدید جھڑپیں ہوئیں اور دھماکے سنے گئے۔ گذشتہ سال نومبر میں ابوالحسان الہاشمی القریشی کی ہلاکت کے بعد ابو الحسین کو داعش کا نیا سربراہ بنایا گیا تھا۔