Raza Musani 
تہران: ایرانی وزیرخارجہ حیسن امیر عبداللہیان نے کہا ہے کہ واشنگٹن صیہونی حکومت کو ہتھیار فراہم کرکے غزہ میں فلسطینیوں کی نسل کشی پر مبنی جنگ کی آگ کو مزید بھڑکا رہا ہے۔ صیہونی حکومت غزہ میں فلسطینیوں کا قتل عام اور نسل کشی کر رہی ہے۔ انہوں نے کہا کہ انتہائی افسوس کی بات ہے کہ امریکہ صیہونی حکومت کی یکطرفہ حمایت کررہا ہے جس سے امریکی دوغلی پالیسی سامنے آرہی ہے۔ مقبوضہ علاقوں میں انتظامی اور سیاسی نظام مکمل طور پر منہدم ہو چکا ہے لیکن امریکی فوجی امداد کے ذریعے صیہونی حکومت کو بحران سے بچانے کی کوشش کر رہا ہے۔ انہوں نے کہا کہ اقوام متحدہ کی سیکورٹی کونسل میں غزہ میں جنگ بندی کی قرارداد کو امریکہ نے ویٹو کرکے صلح کا موقع ضائع کردیا ہے۔ روس اور چین کے وزرائے خارجہ کے ساتھ تہران میں ملاقات کے دوران غزہ میں جنگ بندی کی کوششوں میں تیزی لانے پر اتفاق کیا گیا ہے۔
عبداللہیان نے کہا کہ صہیونی حکومت غزہ سے فلسطینیوں کو مہاجرت پر مجبور اور نسل کشی جیسے اقدامات کررہی ہے۔ امریکہ ایران اور دوسرے ممالک کو فلسطین کے مسئلے کے پرامن حل کے لئے پیغامات بھیج رہا ہے اور دوسری جانب گزشتہ دو ہفتوں کے دوران ہزاروں ہتھیاروں کی کھیپ بھیج کر اور حکومت کی حمایت کر کے غزہ پر جنگ کے شعلے بھڑکا رہے ہیں۔ انہوں نے امریکہ اور صہیونی حکومت کو خبردار کیا کہ زیادہ دیر ہونے سے پہلے فلسطینی عوام کا قتل عام بند کریں۔
