امریکا کو فوجی اڈہ دیا ہے اور نہ دیں گے، پاکستان

اسلام آباد: پاکستانی حکومت نے امریکی افواج کو ملک میں فوجی اڈہ دینے یا مستقبل میں دیے جانے کی خبروں کی سختی سے تردید کی ہے۔ترجمان دفتر خارجہ نے کہا ہے کہ پاکستان میں امریکی فوج کا کوئی فضائی اڈہ نہیں ہے اور نہ ہی ایسی کوئی تجویز زیر غور ہے، اس بارے میں کوئی بھی قیاس آرائی بے بنیاد اور غیر ذمہ دارانہ فعل ہے جس سے گریز کیا جانا چاہیے۔ پاکستان اور امریکا کے درمیان ایئر لائنز آف کمیونی کیشن اور گراؤنڈ لائنز آف کمیونی کیشن کے حوالے سے سال 2001ء سے تعاون کا فریم ورک موجود ہے لیکن اس سلسلے میں کوئی نیا معاہدہ نہیں کیا گیا۔ترجمان دفترخارجہ عاصم افتخار احمد نے ہفتہ وار بریفنگ کے دوران کہا کہ جن حالات میں امریکا کے ساتھ گراؤنڈ اینڈ ائیر لائنز آف کمیونی کیشن معاہدہ کیا گیا تھا وہ بدل چکے ہیں، اب افغانستان میں بھی حالات میں بڑی تبدیلی آ چکی ہے بارہا افغانستان میں سابق حکومت سے سرحد پار حملوں کا معاملہ اٹھایا ہے۔