تحریک آزادی فلسطین کامیاب ہوگی اور اسرائیلی ناسور کا خاتمہ ہوگا، سراج الحق

اسلام آباد : امامیہ اسٹوڈنٹس آرگنائزیشن پاکستان کے سالانہ مرکزی کنونشن کے موقع پر فلسطین مرکز حریت کانفرنس منعقد ہوئی۔ کانفرنس میں ملک بھر سے آئے آئی ایس او پاکستان کے ڈویژنل صدر، یونٹ صدور، اراکین مجلس عمومی، مرکزی کابینہ، سابقین سمیت بڑے تعداد میں حمایان فلسطین نے شرکت کی۔ کانفرنس سے علامہ حسنین گردیزی، آیت اللہ غلام عباس رئیسی، علامہ مرزا یوسف حسین، جناب سراج الحق اور سینئر صحافی ہرمیت سنگھ نے خطاب کیا۔ سابق امیر جماعت اسلامی سراج الحق نے اپنے خطاب میں کہا کہ عالم اسلام کی 74 لاکھ افواج اور 58 اسلامی ممالک کے باوجود فلسطینی مسلمانوں کا کوئی مددگار نہیں، غزہ آج کا کربلا ہے۔ انہوں نے کہا کہ حضرت امام حسین علیہ السلام نے میدانِ کربلا میں لازوال قربانی دے کر امت کو پیغام دیا کہ حقیقی مسلمان وہی ہے جو ظالم کا مخالف اور مظلوم کا حامی بن کر رہے۔ ان کا کہنا تھا کہ بے تحریک آزادی فلسطین کامیاب ہوگی اور اسرائیلی ناسور کا خاتمہ ہوگا۔ انہوں نے کہا کہ اسرائیل نابودی کے سفر پر تیزی سے گامزن ہے، پاکستان میں اسرائیل کے ہمدردوں کی سرگرمیاں قبول نہیں۔ ان کا کہنا تھا کہ حماس، حزب اللہ اور جہاد اسلامی کے اتحاد نے دشمن کی صفوں میں کہرام مچا رکھا ہے، بیت المقدس کی ظلم سے نجات کا واحد راستہ مسلمانوں کے درمیان اتحاد و یکجہتی ہے، شہدا کا خون رائیگاں نہیں جائے گا۔ حریت کانفرنس میں شب شہدا کا بھی اہتمام کیا گیا جس میں علما نے اظہار خیال کیا اور احمد رضا ناصری نے نوحہ خوانی کی۔