ٹی ٹی پی سے ہتھیار چھیننے کیلئے پاکستان سے رقم کی درخواست کی خبربے بنیاد ہے، طالبان

کابل: طالبان حکومت نے ٹی ٹی پی سے ہتھیار چھیننے کے لئے پاکستان سے رقم کی درخواست کی خبر کو بے بنیاد قرار دیتے ہوئے مسترد کردیا ہے۔ ترجمان ذبیح اللہ مجاہد نے کہاکہ کسی بھی ملک کو افغانستان کی سرزمین سے خطرہ لاحق نہیں ہوگا۔ انہوں نے دعویٰ کیا کہ طالبان کو افغانستان میں قیام امن کے لئے غیر ملکی رقومات کی ضرورت نہیں ہے۔ ہم اپنی سرزمین کو کسی بھی ہمسایہ ملک کے خلاف استعمال ہونے نہیں دیں گے اور یہ کام پوری قوت کے ساتھ کیا جائے گا۔ انہوں نے یہ بھی دعویٰ کیا کہ طالبان انتظامیہ کی اس سلسلے کی کوششیں ہی حالات کو سنبھالنے کے لئے کافی ہوں گی۔ پاکستانی اخبار نے دعویٰ کیا تھا کہ افغان طالبان نے کابل میں پاکستان کےفوجی اور سیکیورٹی وفد سے ملاقات کی اور ان سے تحریک طالبان پاکستان کے ارکان سے ہتھیار چھیننے اور ان کی آبادکاری کے لئے رقم کی درخواست کی۔