سعودیہ کا پاکستان میں مزید 60 کروڑ ڈالر کی سرمایہ کاری کا اعلان

ریاض : سعودی عرب نے پاکستان میں مزید ساٹھ کروڑ ڈالر کی سرمایہ کاری کا اعلان کردیا۔ پاکستانی وزیرِ اعظم محمد شہباز شریف اور سعودی وزیرِ سرمایہ کاری و مشیرِ شاہی دیوان نے ریاض میں مشترکہ پریس کانفرنس کی۔ سعودی اعلان کے بعد مجموعی طور پر پاکستان میں حالیہ سعودی سرمایہ کاری کا حجم 2.8 ارب ڈالر ہوگیا۔ پاکستانی وزیراعظم نے کہا کہ سعودیہ سے مل کر خوشحالی و ترقی کی منازل طے کریں گے اور مشترکہ اہداف حاصل کریں گے۔ شہبازشریف نے کہا کہ سعودی ولی عہد محمد بن سلمان کے ساتھ گزشتہ روز انتہائی نتیجہ خیز ملاقات ہوئی ہے۔ انہوں نے کہا کہ سعودی عرب سے سمجھوتوں کی سیاہی خشک ہونے سے پہلے ہی عمل شروع ہو چکا ہے۔ پاکستان اور سعودی عرب مل کر ترقی کی منازل طے کریں گے۔ انہوں نے کہاکہ فیوچر انویسٹمنٹ اینیشیٹو سعودی ولی عہد کا ویژنری منصوبہ ہے، جس سے مجھے خطاب کا موقع ملا، ہم سعودی عرب کی ضرورت کے مطابق ہنر مند افرادی قوت فراہم کریں گے۔