Raza Musani 
اسلام آباد: اسلامی نظریاتی کونسل نے ایک ساتھ تین طلاق دینے کو قابل سزا بنانے کی سفارش کردی۔ چیئرمین ڈاکٹر محمد راغب حسین نعیمی کی زیرصدارت اسلامی نظریاتی کونسل کے اجلاس میں عائلی قوانین سے متعلق حکومتی مسودہ کا جائزہ لیا گیا۔ کونسل نے سفارش کی کہ ایک ساتھ تین طلاقوں پر سزا کیلئے قانون سازی کی جائے۔ کونسل نے جہیز ایکٹ کی خلا ف ورزی پر سزا کو چھ ماہ سے بڑھا کر ایک سال کرنے اور جہیز کی مالیت پانچ ہزار روپے سے بڑھا کر دو تولہ سونے کے برا بر کرنے کی منظوری دی۔ کونسل نے شادی کے بعد بنائی گئی جائیداد کو طلاق کی صورت میں میاں بیوی کے درمیان برابر تقسیم کرنے کی تجویز مسترد کردی۔ کونسل نے نکاح نامے میں شادی سے پہلے خون کی بیماری تھیلی سیمیا کا ٹیسٹ کرانے کا کالم بنا نے کی تجویز سے اتفاق کیا۔ لیکن اس پر اتفاق نہیں ہوا کہ ٹیسٹ پازیٹو ہونے پر شادی کی اجازت نہ دی جا ئے۔ اسلامی نظریاتی کونسل نے انسانی دودھ کا بینک بنانے کی تجویز پر سیمینار منعقد کرانے کا فیصلہ کیا ہے۔
